எப்போ ரிலீஸ்?

பெரும் எதிர்ப்பார்ப்பிற்கு இடையே இருக்கும் படங்களை எந்தெந்த தேதிகளில் வெளியிட தீர்மானித்து இருக்கிறார்கள் என்பது குறித்து சேகரித்த தகவல்கள் :

'சாருலதா' : பிரியாமணி ஒட்டிப் பிறந்த இரட்டையர்களாக நடித்து இருக்கும் படம் இது. சூர்யா நடிப்பில் வெளிவர இருக்கும் 'மாற்றான்' படத்திற்கு முன்பே ஓட்டிப் பிறந்த இரட்டையர்களின் கதையை கூற இருக்கிறது ' சாருலதா'. இப்படத்தை செப்டம்பர் 7ம் தேதி வெளியிட தீர்மானித்து இருக்கிறார்கள்.

'சுந்தர பாண்டியன்' : சசிகுமார் தயாரிப்பில் வெளிவர இருக்கும் படம் என்பதால் கூடுதல் எதிர்ப்பார்ப்பு. உதவியாளர் எஸ்.ஆர்.பிரபாகரனை இயக்குனர் ஆக்கி இருக்கிறார் சசிகுமார். 'கும்கி' பட நாயகி லட்சுமி மேனன் நாயகியாக நடித்து இருக்கும் படம். 'கும்கி'க்கு முன்னரே இப்படம் வெளிவர இருக்கிறது. சசிகுமாருக்கு இப்படமும் வெற்றியைத் தரும் என நம்புகிறார்கள். இப்படத்தை செப்டம்பர் 14-ல் வெளியிட முடிவு செய்துள்ளனர்.

'பீட்சா' : பீட்சா கடையில் வேலை செய்யும் இளைஞனுக்கு ஏற்படும் காதலை மையப்படுத்தி எடுக்கப்பட்டு வரும் படம். இப்படத்தில் விஜய் சேதுபதி, ரம்யா நம்பீசன் உள்ளிட்டோர் நடிக்கின்றனர். புதுமுக இயக்குனர் கார்த்தி இயக்குகிறார். FIRST LOOK TEASER-க்கு கிடைத்து இருக்கும் வரவேற்பை பூர்த்தி செய்யும் வகையில் படம் இருக்கும் என்கிறது படக்குழு. செப்டம்பர் 21-ல் வெளியிட முயற்சிகள் மேற்கொண்டு வருகிறார்கள்.

'தாண்டவம்' : 'தெய்வத்திருமகள்' படக்குழு மீண்டும் இணைந்திருக்கும் இப்படத்தில், கண் தெரியாதவராக இருந்தாலும், ஒலியின் உதவியால் எதிரிகளை எதிர்கொண்டு வீழ்த்தும் வேடத்தில் விக்ரம் நடித்து இருக்கிறார். பாடல்களும் வரவேற்பை பெற்று இருக்கின்றன. இப்படத்தை செப்டம்பர் 28-ந் தேதி வெளியிட முடிவு செய்துள்ளனர்.

'விஸ்வரூபம்' : இந்தியாவில் அதிகப் பொருட்செலவில் உருவாகி இருக்கும் படம். கமல், ஆண்ட்ரியா, பூஜா குமார் மற்றும் பலர் நடித்து இருக்கிறார்கள். கமல் நடித்து, தயாரித்து, இயக்கி இருக்கிறார். இப்படத்தின் டிரைலர் பெரும் வரவேற்பு பெற்றிருக்கிறது. அக்.12 கமல் ரசிகர்களுக்கு கொண்டாட்டம். காரணம், வெள்ளித்திரையில் 'விஸ்வரூபம்'.

'பரதேசி' : பாலா தயாரித்து, இயக்கி வெளிவர இருக்கும் படம். அதர்வாவின் நடிப்பில் வெளிவர இருக்கிறது. பாலா இயக்கத்தில் மிகக் குறைந்த நாட்களில் உருவாகி இருக்கும் படம் இது. அதர்வாவுக்கு ஜோடியாக வேதிகா, தன்ஷிகா ஆகியோர் நடித்துள்ளனர். நாயகன் என்ன வேடத்தில் நடிக்கிறார் இருக்கிறார் என்பதே இன்னும் வெளியிடப்படவில்லை. இதுவே படத்திற்கு ஏக எதிர்பார்ப்பை உருவாக்கி இருக்கிறது. இப்படத்தை அக்.19 அன்று வெளியிட முயற்சிகள் மேற்கொண்டு வருகிறார்கள்.

'மாற்றான்' : 'அயன்' கூட்டணியில் வெளிவர இருக்கும் படம். இதுவரை சூர்யா நடித்து வெளிவந்த படங்களை விட அதிக பட்ஜெட்டில் வெளிவர இருக்கும் படம் 'மாற்றான்'. சூர்யா, காஜல் அகர்வால், கே.வி.ஆனந்த, ஹாரிஸ் ஜெயராஜ் என ஒரு மெகா கூட்டணி இப்படத்தில் இருக்கிறது. பாடல்கள், FIRST LOOK என இணையத்தில் எதிர்ப்பார்ப்பை கூட்டி இருக்கும் இப்படம் செப்டம்பர் 12ம் தேதி வெளியாகும் என தயாரிப்பு நிறுவனம் அறிவித்து இருக்கிறது.

தீபாவளி அன்று விஜய் நடிக்கும் 'துப்பாக்கி', சிம்பு நடிப்பில் 'வாலு' ஆகிய படங்கள் வெளிவரும் என எதிர்ப்பார்க்கப்படுகிறது. கார்த்தி நடித்து வரும் 'அலெக்ஸ் பாண்டியன்', ரஜினியின் 'கோச்சடையான்' ஆகிய படங்களின் பணிகள் தொடர்ந்து நடைபெற்று வருவதால் எப்போது வெளிவரும் என்பது இதுவரை தெரியவில்லை.