விக்ரம்,ஜீவா இணையும் படத்தில் இரண்டு டேவிட், இரண்டு கதைகள்.

விக்ரம், ஜீவா இணைப்பில் தயாராகி வருகிறது 'டேவிட்' ( David ). இரண்டு கதைகள், இரண்டு காலங்கள், வாழ்க்கையை மாற்றும் இரண்டு முடிவுகள் பற்றிய கதை தான் 'டேவிட்'. 

'சைத்தான்' படத்தின் மூலம் தன் மீது வெளிச்சம் பாய்ச்சிக் கொண்ட இயக்குனர் பிஜாய் நம்பியார், அடுத்து இயக்கும் படம் இது. இதனால் இந்தி திரையுலகில் இப்படத்திற்கு பெரும் எதிர்ப்பார்ப்பு நிலவி வருகிறது.

இப்படம் இரண்டு தனிக் கதைகளை கொண்டதாக வித்தியாசமான முறையில் உருவாகி இருக்கிறது. ஒரு கதைக்கு ஒரு ஒளிப்பதிவாளர் என இரண்டு ஒளிப்பதிவாளர்கள் ஒளிப்பதிவு செய்துள்ளனர்.

இரண்டு டேவிட்களின் கதைகளையும், இரண்டு முடிவுகள் அவர்கள் வாழ்கையில் ஏற்படுத்தும் மாற்றங்களையும் விவரிக்கும் இந்த கதையில் ஒரு டேவிட் மீனவராகவும் மற்றொரு டேவிட் இசைக் கலைஞராகவும் இருக்கிறார்கள். இருவரும் ஒரு சிக்கலை எதிர்கொள்ள அதனை அவர்கள் எப்படி எதிர் கொள்கின்றனர் என்பது தான் கதை.

விக்ரம், ஜீவா, நாசர், தபு, ரோகினி ஹட்டங்காடி, லாரா தத்தா, இஷா ஷெர்வானி,கே.பி.நிஷான்,ஜான் விஜய் ஆகியோர் நடித்துள்ளனர்.

'கேட்வே பிலிம்ஸ்' மற்றும் 'ரிலையன்ஸ்' இணைந்து தயாரிக்கும் இப்படத்தை, இசை,நகைச்சுவை,ஆக்ஷன் கலந்து வித்தியாசமான முறையில் இயக்குனர் பிஜாய் நம்பியார் கையாண்டிருக்கிறாராம். 

மீனவர் கதையை 'எந்திரன்' ஒளிப்பதிவாளர் ரத்னவேலுவும், இசைக் கலைஞர் கதையை ஸ்ரீஜல் ஷாவும் ஒளிப்பதிவு செய்துள்ளனர்.